Monseigneur, puys que jay eu ce bien que d’avouer esté

licentyé de vostre seigneurie par celle qui vous a pleu

du Xe du present m’anvoier dèshormais, je prandrey

plus de ardiese que pour faict à vous fère part des

novelles que se presenteront puysqu’il vous plaict

me conjedier et inciter par les vostres de soliciter

monsieur de Bressieu comme je ferey affin que

vostre seigneurie sache par eulx le proffit qu’ilz ont

eu en leurdict du voaige de Angleterre, duquel

je me taix car leurs responces ne sont

guyeres perhentoyres mais le succès quil en

adviendra sera pour tesmoinsgniage. Au demeurant,

je advertirey vostre seigneurie comment le roy au despart

de ceste ville pour neuf ou dix jours s’en alla à

Lisigny près de Meaulx où l’on a faict les nopces

du prince de Condé avec la marquise d’Isle, où

ne acistèrent guyères des prinses du sang

pour cause des cerymonyes non acoustumées.

Les preparatives se font grandes pour le mariage

du roy de Navarre. Lon est en dobte s’ilz esposeront

comme ledit seigneur de Condé. Après le succès, vostre

seigneurie en sera advertye. L’ambassadeur d’Espaigne

est encores en ceste ville, car après sa legation

faicte au roy, le conseil la trouvast adventageuse

qu’on luy dict qu’il falloyt qu’on eust declaration

de son maistre avant qu’il partist. Quant à

la deffecte de ceulx qui sont allés en Flandres,

elle [est] si grande que peu de gens y ont plaisir

exceté le duc d’Albe ; car cest autant a

febly le roy de plus et subjectz. Les seigneurs de

Ranty et de Janllys sont prisoniers. On faict

bruyct quilz eusent esté justiciers, n’ust esté qu’ilz

ont declairés avouer quelques mandement de Sa

Majesté. L’on ne peult scavouer car pour

salver sa vye, on advance beaucop de choses

[v°] comment qu’il soyt, il sont en grand dangier ainsi

qu’on dict. L’on a faict bruyct que monsieur de

La Garde estoy mort et ces estatz donnés à monseigneur

le chevallier d’Angolesme. Il y a bien des meslées

grandes, mais cella se dresse fort rombdement.

Encores à ce matin, ung marchant de ceste ville

m’a dict que troys batheaux chargés de mognitions

sont partis à la mynuyct et s’en vont randre à

Calaix tout mognition de guerre et le tout

couvert de boys qu’on n’am peult aultre chose

descouvrir. Monseigneur pour excuse, je alleguerey

ung proverble des bonnes gens, c’est qu’il

faict malvays donner liberté à foulz et enfens

car il en abusent comme je faictz d’antretenir

votre seigneurie de si peu d’ocation, mais je

prierey Dieu qu’il me doinct quelque moyen que je

me puyse employer pour votre seigneurie, ainsi

que je le desire. En actandant cest heur, je

luy prie de bon cueur,

Monseigneur, qui vous doint en très bonne sancté

longue et heureuse vye, avec tout contantement.

A Paris, ce 26 julhet 1572.

Vostre très humble et obeyssant

serviteur

des Eymars

Monseigneur, je ne vous commande poinct les forces

que le prinse d’Orange conduyct, qui sont de 25 mille

hommes, sept mil chevaulx, avec aultres forces

que deux prinses allemans luy amènent, et jà

se sont saycys de dix ou douze villes. Ilz

prestendent donner unne batailhe audit duc

d’Albe. Cella faict, en advertirey votre seigneurie,

ainsi que je ferey des estatz qui ont vacqué en vostre pays,

combien que si cella a lieu, votre seigneurie en ara sertitude comme celluy qui y est participent dont je me taix.

[fol.81] S’il plaict au second liseur randre la presente

ez mains de madame, elle trouvera que

monsieur de Galgas son filz se porte fort bien,

Dieu graces. Encores dès yer, je le fus vouer

avec mon nepveu La Pimpie. Il m’a promis que

à mon despart, il escripra de ces novelles

à ma dicte dame, comme feront toutz les aultres

ces compaignons. A nuyct, au cocher de Monseigneur

le vicomte de Cadenet, je luy dis y avouer

esté pour vouer comment il se portoyt, il en fust

le plus aise du monde, car il ne scavoyct

poinct qu’il fust de par-descà, et me commanda

de regarder ung jour avant son despart pour

leur donner à disner à toutz. Je pence estre

l’ambassadeur et conducteur, que me sera moyen

descripre à madicte dame et sependant, je

luy baise les mains.

- TOME : XVIII

- F : 80 81::

- EXPEDITEUR : Des Aymards, Jean

- DESTINATAIRE : M. de Gordes

- DATE :

TYPE : reponse

CAT : reelle

- DATE : 1572-07-26

TYPE : expedition

CAT : reelle

- DATE : 1572-07-26

TYPE : expedition

CAT : affiche

- DATE : 1572-08-13

TYPE : reception

CAT : reelle

- LIEU : Paris

TYPE : expedition

GPS : 48° 51’ 24’’ N ; 2° 21’ 07’’ E

- LIEU : Laval

TYPE : reception

GPS : 45° 25' 34'' N ; 5° 93' 35'' E

- HYPERLIEN :

- BIBLIOGRAPHIE :

- NOTE :